‘పేడలో పుట్టిన పురుగులు మళ్లీ అక్కడికే వెళ్లాయి’.. రెబల్ ఎంపీలపై రౌత్ ఘాటు వ్యాఖ్యలు!

మహారాష్ట్ర రాజకీయాల్లో మరోసారి మాటల యుద్ధం చెలరేగింది. శివసేన (యూబీటీ) ఎంపీ సంజయ్‌ రౌత్‌ పార్టీని వీడిన నేతలపై తీవ్రస్థాయిలో విరుచుకుపడ్డారు. ముఖ్యంగా ధారాశివ్ ఎంపీ ఓంరాజే నింబాల్కర్‌, హింగోలి ఎంపీ నగేశ్‌ పాటిల్‌ అస్థికర్‌లను లక్ష్యంగా చేసుకుని విమర్శలు గుప్పించారు.

పార్టీ ఇచ్చిన అవకాశాలతోనే రాజకీయంగా ఎదిగిన నేతలు ఇప్పుడు పార్టీని వీడడం ద్రోహమని రౌత్ అన్నారు. ఒకప్పుడు ఉద్ధవ్ ఠాక్రేను ఎప్పటికీ వదిలిపెట్టనని చెప్పిన నేతలే ఇప్పుడు మారిపోయారని ఎద్దేవా చేశారు. ‘‘పేడలో పుట్టిన పురుగులు మళ్లీ పేడలోకే వెళ్లాయి’’ అంటూ ఘాటు వ్యాఖ్యలు చేశారు.

ఉప ముఖ్యమంత్రి ఏక్‌నాథ్‌ షిండేపై కూడా రౌత్ విమర్శలు సంధించారు. ప్రస్తుతం అధికారంలో ఉన్నా రాజకీయాల్లో పరిస్థితులు ఎప్పుడైనా మారిపోతాయని అన్నారు. ఈ రోజు ఉన్న పదవులు రేపు ఉండకపోవచ్చని వ్యాఖ్యానించారు. షిండేను పెద్ద రాజకీయ నాయకుడిగా చూపించే ప్రయత్నాలను కూడా ఆయన కొట్టిపారేశారు.

మరోవైపు పార్టీ చీఫ్ ఉద్ధవ్‌ ఠాక్రే కూడా రెబల్ నేతలపై ఆగ్రహం వ్యక్తం చేశారు. పార్టీ ఎంపీలు, ఎమ్మెల్యేలను ఆకర్షించే ప్రయత్నాలు కొనసాగితే ‘ఆపరేషన్ టైగర్’కు ప్రతిగా ‘ఆపరేషన్ లోటస్’ చేపడతామని హెచ్చరించారు. పార్టీని బలహీనపరిచే కుట్రలు సాగుతున్నాయని ఆరోపించారు.